Piana de Marsèzina (2/4)

Flora e fàuna – Ła piana de Marsézina ła se caratariza par na biodiversità varia e ùnega. In partegołare A ze prezente do torbiere, aree pałudoze che łe parmete ła conservasion de spesie vezetałe altrimente asente, in partegołare serti tipi de piante tìpeghe de’l clima àrtego, prezente in pasà so łe Alpe durante łe Ere glasałe ma che łe ga podesto soravìvar solche inte l’anbiente ùmido spesiałe de ła torbiera (par ezenpio ła Andromeda polifolia). Senpre a łe torbiere ła ze łigà ła prezensa de spesie de piante carnìvore (par ezenpio ła Drosera rotundifolia) e de ozełi migradori. I boschi de pesi rosi i ze ła caza de arcuanti mamìfari cofà cavriołi, siervi, volpi, tasi, fuine, martorełi, ormezini e de barbastreji. Inte i ùltemi ani A ghe ze stà anca avistamenti de orsi e de łovi.