Piana de Marsèzina (4/4)

Ła storia pì resente – Ła piana, viste łe só condision climàteghe difìsiłe no ła ga parmeso in pasà na frecuentasion umana stàbiłe durante tuto l’ano (A ze ipotizàbiłe che anca i casadori preistòreghi in inverno i tornase zo inte ła vałe de ła Brenta). Inte ła beła stajon, parò, in partegołare durante el dì A ghe ze tenparadure asà pì mite e i pastori de l’Altipian de Aziago e de ła Valsugana i venjeva a Marsézina par far pascołar i só sciapi. Propio par via de łe barufe tra i pastori de l’Altipian e cuełi de ła Valsugana i respetivi governi, ła Repùblega de Venesia e l’Inpero Strìaco, i ga stabiłìo inte’l 1752 cuało che l’era el confin ezato tra i do stati cołogando dełe piere mejare. Ła paze de ła piana ła ze stà dapò turbà solche da i conbatimenti de ła Prima Guera Mondiałe. Atualmente ła ze na òtema meta pa’ i amanti de ła mountain bike e de’l trekking.