Architetura de’l Siesento veneto II (2/4)

BALDASAR ŁONGHENA – Co i pałasi Zustinian-Łołin e Widmann el Łonghena el se fa notar pa’l suparamento sia de’l rigorizmo de i proti che de’l claseghizmo sansovinian. A partir da metà ‘600 ła Repùblega ła gavéa scomisià a rancurar nove cazade patrisie “par soldo” e da cuà l’architetura siviłe de ła sità ła se farà senpre pì monumentałe e sfarsoza par ła conpetision de imàzene tra I patrisi novi e veci. El Łonghena el sarà protagonista de ‘sta faze nova prozetando, cofà che łe fuse sculture, Ca’ Bon (dapò Rezzonico) e Ca’ Pézaro. Cuà l’architeto venesian el revołusiona ła planimetrìa tradisionałe co un manjìfego scałon a cołigar ła corte a’l pian teren co’l sałon grando suparior.