L’AŁEANSA CO ARAGONEZI E ROMANI – Co’l tenpo Zenoa ła ze bona de redùzar drioman ła prezensa venesiana inte’l Mar Mazor, fin che ła situasion par Venesia no ła deventa insostenjìbiłe. A càpita ałora che el 6 agosto 1350 el Mazor Consejo el ghe declara guera a Zenoa e l’inbastise su na flota de trentasincue gałèe a’l comando de Marco Rusini co’l scopo de rónpar el bloco navałe inte’l Mar Mazor, ma el tentadivo no’l sortise pułito. L’ano drio ła Repùblega veneta ła ze bona, parò, de stipułar na ałeansa co i Aragonezi, rivałi de Zenoa, come anca co Bizansio che ła sperava de poderse łibarar de l’ezemonìa zenoeze. Zenoa ła arma ałora na flota numaroza a’l comando de Pagano Doria e ła èvita par poco che ła coałision nemiga ła tèrmene l’asedio de’l cuartier comersiałe de Gàłata, piłastro fondamentałe de’l comersio łìgure inte’l Mediteraneo orientałe.
Da’l Łunaro Veneto 2024, Novenbre in 4 artìgołi:
- NOVENBRE/1 – ŁE CÀUZE (1/4)
- NOVENBRE/2 – L’AŁEANSA CO ARAGONEZI E ROMANI (2/4)
- NOVENBRE/3 – ŁA BATAJA DE’L BÒSFORO (3/4)
- NOVENBRE/4 – I SCONTRI IN SARDENJA E ŁA FINE DE ŁA GUERA (4/4)
