ŁA BATAJA DE’L BÒSFORO – Ła bataja pì importante de ła guera, anca se mìa desiziva, ła vien conbatùa inte łe acue de’l Bòsforo el 13 febraro 1352. Ła bataja ła ze stà asà sanguinoza e caòtega, ła se ga invià sensa che łe flote łe podese métarse in formasion par via de na tenpesta rivà a l’inpensada, ła stajon invernałe e l’ora tarda de’l scomisio de i scontri (siché A se ga conbatùo anca durante ła note). Da tute do łe parte A vien subìe grose pèrdite, ma soratuto ła situasion ła deventa grave pa’ i aragonezi che a un serto ponto i ze costreti retirarse. A vien copà sia el comandante aragoneze che cueło venesian. I zenoezi, invese, pur catàndose desimài, i ze boni de mantenjerse in canpo e de blocar Costantinòpołi costrenzendo l’inperador roman a ła reza.
Da’l Łunaro Veneto 2024, Novenbre in 4 artìgołi:
- NOVENBRE/1 – ŁE CÀUZE (1/4)
- NOVENBRE/2 – L’AŁEANSA CO ARAGONEZI E ROMANI (2/4)
- NOVENBRE/3 – ŁA BATAJA DE’L BÒSFORO (3/4)
- NOVENBRE/4 – I SCONTRI IN SARDENJA E ŁA FINE DE ŁA GUERA (4/4)
