Arborèa (4/4)

EMIGRASION, ECONOMÌA, ŁENGUA E TRADISION (parte II) – Intrà el 1936 e el 1940 A ze rivà altre fameje venete, soratuto trevizane. Fin a i primi ani 60 Arborèa ła jera na enclave veneta in Sardenja (łe fameje de mezadri sardi łe jera solche 9 so 264), ma co’l boom de łe industrie de’l nord Itałia tante łe ze repartìe n’altra volta e A ze rivà altre fameje sarde soratuto da’l sentro nord de l’ìzoła. Ancó Arborèa ła ze un paeze de poco manco de 4000 abitanti. Łe atività prensipałe łe ze l’agricoltura e el zlevamento co ła prezensa de łe tre cooparadive pì inportante de ła Sardenja. Ancó A ghe ze uncora na cuota de popołasion che ła parla uncora veneto, na parsona so cuatro, anca se cheł’altri no i fa mìa fadiga capirlo. Ła festa pì inportante ła ze ła sagra de ła połenta, ma A ze festejà anca el Redentor cofà a Venesia e el 5 de zenaro A tien duro el “Bruza ła Vecia”.