Dante in Veneto e el Veneto in Dante I (4/4)

CANGRANDO I – Morto Alboin inte’l 1311, ła guida de ła dinastìa ła vien ciapà da Cangrando I che’l portarà a’l màsemo splendor ła senjorìa veroneze. Àbiłe e vałorozo condotiero, el vien recordà da Petrarca e da Boccaccio anca par ła só zenerozità e ospitałità. In Paradiso XVII Dante el ghe reserva łe pì alte łode, recordando i benefisi resevùi da łu, rivando po’ a dedegarghe l’intiera tersa càntega de ła Commedia inte l’Epistola XIII (anca se A ze in dubio che ła sipie davero dantesca). Seben che el senjor veroneze el fuse stà ghibełin, A pararìa che Dante el vedese in łu ła figura forte in grado de reportar ła paze in Italia, anca se A no ze mìa seguro che el sie da identifegar co’l veltro de ła profesìa a Inferno I. Dante el restarà Verona insieme co i fiołi par tanti ani, almanco fin a’l zenaro de’l 1320, drio l’atribusion de ła Quaestio de aqua et terra.