Dante in Veneto e el Veneto in Dante I (3/4)

I DE ŁA SCAŁA –  Ma, pensado a i raporti tra Dante e el Veneto, A vien suito inamente ła só rełasion co i potenti senjori de Verona, i De ła Scała. Inte ła Commedia Dante el definise cofà só primo recòvaro e osteło ła cortezìa de un Scałìzaro (Par. XVII 70-72). Considarando che Dante el vien eziłià inte’l 1302, A se połe ałora determenar che’l ze drio parlar de Bartołomèo I, che’l ło gavarìa acetà tra el 1303 e el 1304. A pararìa che dopo de ła morte de Bartołomèo, inte’l marso de’l 1307, Dante el se gavarìa presto zlontanà da Verona no sendo mìa in boni raporti co’l sucesor Alboin che Dante el demostra de despreziar inte’l Convivio (Conv. IV xvi 6). Parołe de dura crìtega Dante el łe esprime anca par n’altro De ła Scała, Izepe, abate de San Zen e fradełastro de Bartołomèo, definìo coroto inte’l corpo e inte ła mente (Purg. XVIII 124-125).