Piana de Marsèzina (3/4)

El Riparo Dalmieri – Łe prime frecuentasion umane note inte ła zona łe ne ze testimoniàe da łe descoverte fate da i archeòłozi inte’l Riparo Dalmieri, un sito abità da na comunità de casadori sunadori pì o manco 13 miła ani indrìo. A se senjała, oltra a un serto nùmaro de resti de animałi e de strumenti in piera pa’ ła łaorasion de l’oso e de łe pełe, i resti de na capana e de fogołari, 32 cape provenjente da’l Mediteraneo doparàe probabilmente cofà ornamenti, sete denti che dei putełi preistòreghi i ga perso durante ła crésita ma soratuto ben 267 piere cołoràe de ocra, tante co raprezentasion de animałi e una co na figura umana. El fato che łe piere łe fuse stàe mese so na area łimità e che bona parte łe gavese ła parte cołorà verso el teren el porta a pensar a na dispozision mìa cazuałe e a na funsion rituałe de na parte de’l sito.