Ła Cuerina e el bacałà (primi 2 artìgołi): VERSO ŁE FIANDRE + DA’L SÌRCOŁO POŁAR A VENESIA

VERSO ŁE FIANDRE – el nòbiłe veneto Piero Cuerin el parte da Candia el 25 apriłe 1431. Inte l’ìzoła el ga dei fèudi dove A se produze un òtemo Malvazìa partegołarmente apresà inte’l Nord Europa e Piero el ze direto propio łà, a łe siore Fiandre, par far sù grande fortune.

El viaja so de na caraca che da łu ła ciapa el nome, ła Cuerina, co 68 òmani a bordo. A no se cata parìgołi inte’l Mediteraneo e ła nave no incroza né pirati né i nemighi zenovezi. Ma, a fine agosto, da rente Łizbona, ła taca ‘ver problemi a’l timon e A ghe toca fermarse inte ła sità spetando da novo venti favorévołi.

Piero el deside de repartir el 14 setenbre e, ndando a nord, el se consede na pia vìzita a’l santuaro de San Jàcomo. Reciapà el mar, el viajo el ciapa na bruta piega: suparà el Cao de Finisterre na serie de tenpestade łe ronpe el timon de ła Cuerina e łe ła spenze verso l’Irlanda.

DA’L SÌRCOŁO POŁAR A VENESIA – e a chel ponto ła nave ła taca ndar soto acua, l’ùnega salvesa ła ze in do sałupe. Tenpo un dì e una de łe do ła sconpare. A semo el 18 setenbre da calche parte inte l’Atlàntego Setentrionałe. Par tre infinìe setimane i soravisùi i vaga sensa na meta presiza soportando el terìbiłe fredo invernałe de chełe rejon e tanti i more inzełài.

Fin che’l 6 zenaro no i riva so na ìzoła dezerta, restài in sédaze. Co i ga perso onji speransa i incontra un pescador co só fiołi che’l łi socore e presto i descoverze de èsar finìi inte un arsipèłago a nord de ła Norveja (łe ìzołe Łofoten). Pena che ła verta ła ło parmete Piero Cuerin e i conpanji soravisùi i vien reportài so’l continente, in Norveja. Scanpà el parìgoło, i se mete in viajo par tornar caza, jutài da un nòbiłe veneto (cuała sorpreza!) feudataro de’l re de Norveja. Piero Cuerin el torna finalmente Venesia, co soło 12 conpanji, el 12 otobre 1432.

~

Da’l Łunaro Veneto 2021, Zunjo in 4 artìgołi:

  • ZUNJO/1 – VERSO ŁE FIANDRE
  • ZUNJO/2 – DA’L SÌRCOŁO POŁAR A VENESIA
  • ZUNJO/3 – BRUSTOŁON A’L CUIRINAŁE
  • ZUNJO/4 – SÌRMOŁO
Dizitałizasion de’l testo de Zunjo 2021 de’l Łunaro Veneto 2021.
Reprodusion autorizà da Academia de ła Bona Creansa

 

 

 

Leggi altri articoli:

Łuna

ŁUNA (2019)(Andrea Scarcia) Cuante parołe scoltade de sconto fra le stełe in noti de argento cuanti segreti incastrài inte’l vento...

VAI ALL'ARTICOLO >>