Architetura de’l Siesento veneto I (4/4)

Architetura venesiana inte’l 1° Siesento – L’Intardeto papałe de’l 1606 el gavéa renforsà ła fasion połìtega de “i Zóvani”, un grupo de patrisi venesiani orientài contro ła curia e el papado e a favor, invese, de l’autonomìa połìtega e culturałe de ła Repùblega. In canpo architetònego i sostenjarà ła corporasion de i proti anca par cuanto che revarda ła costrusion de i pałasi da abitasion novi, che donca i vien fati su conformi a’l rigor de l’antiga virtù de ła mediocritas e co’l dòparo solche de maestranse łocałe. El pałaso pa’l doze Łeonardo Donà (1610), in Fondamenta Nove, el vien fato su segondo un łenguajo autòctono e severo, co’l pòrtego tradisionałe, deventando cusì el manifesto de ‘sta vizion.