Ła Piasa de i Siori a Trevizo I (1/2)

ŁA STORIA TRAVERSO I SÈCOŁI – Ła Piasa de i Siori a Trevizo ła ze considarà da’l bon el łogo pì enblemàtego e raprezentadivo de ła sità veneta. E sin da l’època pì remota ła ze senpre stà el sentro de’l tesudo urban parché łocałizada darente el ponto de incrozo de l’antigo cardo (ła Cal Major de ancó) co’l decuman. Tanto che inte’l pasà ła jera anca ciamà “Piasa de’l Carubio” a dir ła volgarizasion de la paroła “quadruvium”. Durando el Medio Evo ła ga mantenjesto ła só funsionałidà de sentro połìtego siviłe deventando sede de cheła “Domus lapidea commumis”, durando el Łibaro Comun de Trevizo, che dapò ła deventarà el Palaso de ła Sinjorìa. E co ła dedision a ła Republega Veneta, inte’l XIV sècoło, el Pałaso el se converte inte ła sede de’l Podestà nomenà da’l Goerno Veneto. Via de tut l’imàzene da cartołina che gavemo a’l dì de ancó no ła coresponde a l’aspeto architetònego che’l ghe jera fin a njanca 150 ani indrìo, mostrando na discordansa co’l stiłe e co’l łenguajo che i gavéa ciapa forma e i jera evolvesti durando i tanti sècołi de apartenensa de Trevizo a ła Serenìsima Repùblega.