Ła Piasa de i Siori a Trevizo I (2/2)

ŁA PIASA A I TENPI DE ŁA SERENÌSIMA – Par capir mejo i canbiamenti che i ghe ze stài A ze nesesario ndar a vardar łe rafegurasion pitòreghe pì vecie de ła piasa: par ezenpio un afresco in Viła Axel a Posmon de Montebełuna, che el mostra l’aspeto inte’l XV sècoło, o sinò un cuadro de’l pitor Bortołomio “Medoro” Cogheto che el mostra na vista setesentesca. In tuti i cazi A se pol vèdar da’l bon che el Pałaso de’l Podestà el jera revestìo de intònago e el prezentéa un stiłe conpozidivo da’l bon tardomedievałe co ła dispozision asè łìbara e sensa simetrìa de łe fenestre (monòfore e połìfore) e co tanto de scałon grando che’l portéa rento a’l Pałaso de i Trezento. De fati A se vede anca el łato de ła Łoza de i Trezento che el fa canton, co un basorełievo asè grando de’l Łion de San Marco inte ła fasada e sensa łe pitoresche merladure medievałe che catemo a’l dì de ancó. Inte l’afresco pì vecio A se pol védar che el pian de canpanja de ła Łoza el jera conposto da na serie de arcadełe sotiłe conforme a’l łenguajo venesian medievałe e che solche dapò de’l Sincuesento łe venjarà modifegàe inte i piłastri grosi e scuazi monumentałi che i ghe ze uncora deso.