Ła Siviltà Veneta in viła (2/4)

ARCHITETURA DE ŁE VIŁE VENETE (2/2) – A partir da ła fine de’l ‘500 el łenguajo paładian el sarà da fondamento par tanti architeti dapò de łu: par ezenpio el Scamosi, el venesian Zorzi Masari (Viła Cordełin a Montecio), Fransesco Mutoni (Viła Fracansan Piovene a Orgian). In chełe fàbreghe A se cata, a’l łeveło de’l pian nòbiłe senpre sołevà, el pronao co tìnpano e órdeni clàseghi e el sałon a tuta altesa. M’A ghe ze anca na bona parte de viłe prozetàe co ła tìpega tripartision de ła casa fóntego venesiana: ingreso co’l pòrtego pasante a łeveło de canpanja, pian suparior co’l sałon grando, pian ùltemo co magazeni e łocałi de servisio. Tra ‘600 e ‘700 A ghe sarà anca epizodi de architeture asè sfarsoze e maestoze: Viła Contarini a Piasoła so ła Brenta (co ła piasa a emisiclo, 1546-1676), Viła Pizani a Stra (ła “Versailles veneta” de’l Frigimelica, 1721), Viła Manin in Furlania (XVIII sèc).