Ła Siviltà Veneta in viła (1/4)

ARCHITETURA DE ŁE VIŁE VENETE (1/2) – Łe prime viłe de’l ‘400, prinsipalmente fate su da fameje notàbiłe de ła Teraferma, łe ciapa a modeło l’architetura venesiana de l’època e donca A gavemo Viła Da’l Verme a Agujaro (“ła mare de tute łe viłe”) fata su cofà na caza-fóntego gòtega. In Viła Porto Colleoni a Thiene, “el Castel”, i se insenbra pì łenguaji veneti: vołumi de’l Fóntego de i Turchi a Venesia, fenestra pentàfora gòtega e mura co merładure cofà łe fortifegasion medievałe. I patrisi venesiani Zustinian inte’l primo ‘500 i comisiona a Roncàe (Marca Trevizana) n’altra viła ciamà “Castel”: na fàbrega paronałe renasimentałe rento un inpianto planimètrego organizà in modo orgànego e inovadivo, a’l contrario de łe anacronìsteghe mura merłàe co łe tore. Coeva de ‘sta cuà, senpre inte’l trevizan, ła Viła Tireta co łe barchese che łe antìsipa cuełe paładiane.