Piero Gonzaga (4/4)

I eventi de ła corte – Łe conpetense artìsteghe de Pietro łe ze stàe apresàe a’l ponto da da afidarghe incarghi che i ndese ben oltra ła conpozision de senografìe da teatro. In partegołare, Pietro l’è stà ingagià pì volte da ła fameja reałe par cołaborar a zestir łe sełebrasion pùbleghe de eventi sentrałi pa’ ła monarchìa dove che anca l’aspeto vizivo el gaveva ła só fondamentałe inportansa inte ła raprezentasion maestoza che i sovrani i vołeva dar de sì, par ezenpio in ocazion de’l funerałe de l’inperadora Caterina e ła sucesiva serimonia pa’ l’incoronasion de Poło I a Mosca dove che Pietro el se ga ocupà de łe senografìe e de l’arco trionfałe fati su par farghe da sfondo a’l cortèo. El servisio rezo a ła corte el continua anca soto el zar Ałesandro I e Pietro el vien ciamà pa’ i festejamenti dopo de ła sconfita de Napołeon. Pietro el morirà a Pietroburgo inte’l 1831.