SANTA JUSTINA – Justina ła zera na esponente de na nòbiłe fameja padoana a’l tenpo de l’inperador Dioclesian (fine III sècoło-scomisio IV sècoło). ‘Sto inperador l’è pasà a ła storia anca parché el ga cauzà una de łe pì viołente parsecusion anticristiane in tuto l’Inpero roman, dopo ‘verlo reunìo da novo soto el só controło. Propio durante ‘ste parsecusion inte ła sità de Padoa A se vien saver che Justina ła zera cristiana, donca ła vien caturà e mesa soto proseso. Co promese e co menase i parsecudori i tenta de farghe renegar ła só fede cristiana, tornando a prategar i culti pagani. Ma no i ze mìa boni in nesun modo de farla venjer manco da łe só convinsion, njanca recordàndoghe che ła punision par ‘sta rezistensa ła ze ła mesa a morte. Justina pur de no refudar ła só fede ła ghe va incontro a’l martirio el 7 otobre de’l 304.
Da’l Łunaro Veneto 2022, Apriłe in 4 artìgołi:
- APRIŁE/1 – SANTA JUSTINA
- APRIŁE/2 – EL CULTO DE SANTA JUSTINA
- APRIŁE/3 – SAN PROZDÒZEMO
- APRIŁE/4 – EL CULTO DE SAN PROZDÒZEMO
