ŁÀUREA – Inisialmente, el nome el jera un ajetivo: “corona laurea” in łatin, ła sarìa ła corona fata de rameti intorcołài de łoraro (Laurus nobilis). Dopo, da “corona laurea”, A se ze pasadi a dir soło “laurea”, in veneto “łàurea”, par indegar tuta ła serimonia e el tìtoło, anca se oltre a ła corona a i łaureadi A se ghe dava anca l’aneło dotorałe.
Ła Èłena Łucresia Cornaro Piscopia ła ze stà ła prima dona a łaurearse inte’l mondo e inte’l 1906 el Vassar College (New York) el ghe ga dedegà na ała de ła Thompson Memorial Library, decorà co ła “Cornaro window”.
Ła verada ła reprezenta łe sete disipline de ła Gramàtega, Diałètega, Mùzega, Fiłozofìa, Astronomìa, Medezina, Zeometrìa e Teołozìa. Par baso, arcuanti anzołeti cherubini i tien sù un ròdoło co scrito in łatin “In Laud Helenae Lucretia Cornelia Piscopiae Lauria Philo In Patav Gymn Unico Ex-Emplo Donatae”.
Ła łàurea, in chel tenpo, ła conportava anca che se deventase insenjante. Ma a ła Cornaro Piscopia A no ghe ze mìa stà łasà, parché “mulieres non docent”, łe fémane no łe insenja mìa, par dirla co San Pàoło.
~
Da’l Łunaro Veneto 2019, Zenaro in 4 artìgołi:
- ZENARO/1 – Na paroła: ŁÀUREA
- ZENARO/2 – Un posto: PIANETA VÈNERE – CRATERE PISCOPIA
- ZENARO/3 – Un parsonajo: ROZALBA CARIERA
- ZENARO/4 – Un evento: ŁA PRIMA UNIVARSITÀ VENETA (e no ła ze mìa Padoa!)
Dizitałizasion de’l testo de Zenaro 2019 de’l Łunaro Veneto 2019.
Reprodusion autorizà da Academia de ła Bona Creansa
