REITIA – Reitia ła ze ła pì conosùa de łe Divinità de i antighi Veneti: el nome el ga orìzene inserta. Da na banda, el podarìa senjifegar “cueła che ła indrisa” (i torti, e donca na Dea de ła justisia, o na Dea che ła favorise łe nàsite indrisando i picenini vanti de’l parto).
Senò, el nome el podarìa derivar da’l verbo de ła raiza “rhe”, che el vol dir scorimento, co refarimento a’l fiume o anca a ła scritura, e tuto cueło che’l ze łigà co’l conseto de fluso e de fluir, donca par estension anca l’abondansa e ła richesa.
Inte’l só santuario de Ateste (Este) A se ga catà arcuanti stiłi scritorji, par ła scritura so tavołete. Inte’l santuario, reservà a łe done, A se insenjava ła scritura e fursi a ła fin de l’inparar el scołaro el “sagrifegava” el só strumento a ła divinità protetora.
A’l nome Reitia A se ghe zonta l’epìteto “Sainate”, Dea sanadora, guaridora. Inte’l santuario de Este A se conduzéa riti de pasajo de i zóveni inte l’età adulta: A ło savemo da i retrovamenti de ojeti de dòparo comun donài in scała redota cofà łanse, scudi, vestimenti, sinturoni e ojeti par ła tesidura.
~
Da’l Łunaro Veneto 2019, Majo in 4 artìgołi:
- MAJO/1 – Na paroła: REITIA
- MAJO/2 – Un posto: SANTUARI VENETI
- MAJO/3 – Un parsonajo: ŁA DEA VENETA
- MAJO/4 – Un evento: OTOSENTO ANI DE ŁÀGOŁE
