SANTUARI VENETI – I santuari veneti i jera łoghi de culto sénplisi, indove ch’A se venarava i łe Divinità, e scuazi senpre i jera in canpo verto, rento boschi sacri, fora da i spasi abitài visin a rivi, łagheti, o sorzente de fiumi.
Ła cołocasion de łe aree sacre visin a rivi o a sorzente ła ze intaresante parché ła fa capir cuanta inportansa che ła gaveva l’acua par i veneti antighi. L’acua cofà ojeto de culto, bevesta cofà resanadora, cosparzesta so’l corpo e tenjùa par sacra anca inte łe forme pì comune inte i łagheti, inte i posi cofà dimora de ninfe e altre divinità.
On inportante santuario el se cata visin a’l sentro de Este: defati in tenpi antighi fiume Àdeze el scoreva tacà a’l sentro abità. Altri łoghi sacri i se catava a S. Piero Montanjon (Àbano, deso Montegroto), a Padoa, a Visensa, Montebełuna, Magrè, Łàgołe de Cador, Caldevigo, Pervałe, San Zeno de Verona.
A conosemo co seguresa i loghi sacri anca da cueło ch’A ze stà catà cofà łàmine co iscrision in łengua veneta antiga, arme, reprodusion de parte de’l corpo małade par dimandar ła guarijon, statuete, menestri, seràmeghe.
~
Da’l Łunaro Veneto 2019, Majo in 4 artìgołi:
- MAJO/1 – Na paroła: REITIA
- MAJO/2 – Un posto: SANTUARI VENETI
- MAJO/3 – Un parsonajo: ŁA DEA VENETA
- MAJO/4 – Un evento: OTOSENTO ANI DE ŁÀGOŁE
