Ła stanpa ła nase Feltre (2/4): PAŁIO DE FELTRE

PAŁIO DE FELTRE – El “Pałio” el ze sì na manifestasion stòrega, ma vanti de tuto el gera el drapo de’l vinsidor, tuto decorà e grandamente anbìo da i partesipadori, e ciamà sinpategamente anca “la stratha” (ła strasa).

Istituìo ła prima volta inte’l 1388 come festejamento par ła fine de ła Sinjorìa de i da Carara (mìa tanto ben vołesta da i feltrini) el ze deventà stàbiłe par onorar el Pato de Dedision de Feltre a ła Repùblega Veneta inte’l 1404.

I Statudi sitadini de Feltre i disponéa che, recorendo el 15 de zunjo, dì de San Vio, de onji ano ła Sità ła gavese da organizar na corsa de cavałi. Chel dì, defati, inte’l 1404 ła sità de Feltre, come dełibarà da’l governo sitadin, ła ga fato ła consenja de łe ciave de ła sità par man de’l nòbiłe Vetor Mufoni a l’anbasador de’l Stato Veneto, Bartołomèo Nani.

Da łà in vanti, ła Feltre urbana e anca el teritorio feltrin datorno i ze intrài a far parte de ła Repùblega Veneta, sconpartìndoghene i destini fin l’ùltemo dì. El Pałio el se fa ancora inte i nostri dì.

~

Da’l Łunaro Veneto 2019, Marso in 4 artìgołi:

  • MARSO/1 – Na paroła: TORCIO
  • MARSO/2 – Un posto: PAŁIO DE FELTRE
  • MARSO/3 – Un parsonajo: PÀNFIŁO CASTALDI
  • MARSO/4 – Un evento: EL CORAN DE I PAGANINI
Dizitałizasion de’l testo de Marso 2019 de’l Łunaro Veneto 2019.
Reprodusion autorizà da Academia de ła Bona Creansa