Scritura de i Veneti antighi (1/4)

I SENJI – Łe prime iscrision inte ła łengua de i Veneti primi łe remonta a ła prima metà de’l VI sècoło v. C. Cofà l’alfabeto łatin cueło veneto el derivava da cueło grego, ma co na intarmediasion de cueło etrusco. A se połe donca ipotizar che ła scritura ła ghe sipie rivà a i Veneti traverso de i sentri etruschi setentrionałi (probabilmente da ła sità de Chiusi). A se połe sernire do faze stòreghe fondamentałe de ła scritura: na faze pì antiga che ła dura fin a ła fine de’l VI sècoło caratarizà in partegołare da l’asensa de pontuasion e na seconda che ła va da ła fine de’l VI sècoło fin a ła fine de’l I sècoło v. C. che ła prezenta el dòparo de ła pontuasion e dei novi senji par raprezentar i soni ocluzivi dentałi (overo ła T e ła D).