Mamut in Tera Veneta (2/2)

ENORME CREATURE – Anca venjendo a èpoche ben pì resente, parò, ła situasion ła ne pararìa isteso tanto difarente da ła nostra. Se A tornàsimo indrìo de “solche” calche desina de mejari de ani A vedarìsimo na mołe de giaso enorme che ła coverze scuazi conpletamente l’arco alpin, rivando fin a dove che deso A ghe ze el łago de Garda. I giasari, defati, i ze stài un inportante fator de trasformasion de’l teritorio, scavando vałe e pafin intieri łaghi, come cueło de Garda. Co altretanta maraveja A se incorzarìsimo de l’asensa de l’atuałe costa adriàtega, che ła se catava sentenari de chiłòmetri pì a sud, a l’altesa de l’atuałe Abruso. El paezajo el somejarìa èsar na tundra freda, sìmiłe a na stepa co pochi àlbari, dove che i òmani preistòreghi i conviveva co sciapi de bizonti, rene e mamut. Propio i resti de un enorme mamut i ze stài catài a Vidor inte’l 1974. El gaveva da èsar uno de i ezenplari pì grandi in Europa, un mascio adulto alto ben cuatro metri, tre e mezo a ła spała, co denti łonghi tre metri e sesanta, morto probabilmente par l’età, 40/45 ani drio łe stime. El ze atualmente conservà inte’l muzèo de Crozeta de’l Monteło insieme co’l schèłetro de n’altro mamìfaro grando de chel’època, el temìbiłe orso de łe caverne.