ŁE COŁINE DE’L PROSECO – In provinsa de Trevizo, tuta ła zona cołinar łimità idealmente da i Comuni de Valdobiàdene, Vitorio Veneto, Fara de Sołigo e Refróntoło ła ze caratarizà da na partegołare conformasion zeomorfołòzega ciamà “hogback” (łetaralmente “schena de’l porsel”) ndove che l’industriarse de l’omo l’à parmeso ła formasion de na serie de terasamenti deventài boni par piantar vinjeti de ua de cuałità, doparà par ła produsion de vin Proseco.
Par vero A ze da presizar che de fianco de ‘sta cusì dita “core zone” A ghe ze ła “buffer zone” che ła ciapa rento anca i Comuni de Conejan, Suzegana e altri, par formar cueła che inte’l 2019 ła ze deventà zona Patrimonio de l’umanità de l’UNESCO, mostrina de cuałità sertifegada ndove ch’A se dòpara tècneghe e règołe de salvavardia e zestion de’l paezajo a tuteła de l’anbiente e de łe parsone, reconosesta (e in parte anca copià) in tuto el mondo.
~
Da’l Łunaro Veneto 2021, Desenbre in 4 artìgołi:
- DESENBRE/1 – EL BALDON
- DESENBRE/2 – ŁE COŁINE DE’L PROSECO
- DESENBRE/3 – GIACOMO AGOSTINETTI
- DESENBRE/4 – INBIANCAR EL RADICIO
