El nome “Bucintoro” el vien da’l venesian “burcio de oro“, l’antiga inbarcasion piata doparà in łaguna par portar marcansìe, prezente anca inte i diari de’l Marin Sanudo.
‘Sta inbarcasion ła zera doparà da’l Doze solche par ła seremonia de’l Spozałisio de’l mar inte ła festa de ła Sensa. Pa’l resto de l’ano ła restava inte l’Arsenałe. Ła zera na gałèa łusuoza, alta e grosa, piena de decorasion e sìnbołi.
Łe só orìzene antighe łe va indrìo a i festejamenti par ła vitorioza spedision organizada da’l Doze Piero Orsèoło II contro de i pirati narentani in Istria e Dalmasia.
El nome “Bucintoro” el conparise parò soło inte’l 1300 e łe prime raprezentasion łe ze datàe a’l ‘500. Fin a’l 1401 ła jera doparà anca par altre funsion oltra che par manifestasion ofisiałe.
Łe trupe de Napołeon łe riva Venesia inte’l 1797, łe ghe dà fogo a l’ ùltemo Bucintoro da rente a l’ìzoła de San Zorzi.
~
Da’l Łunaro Veneto 2020, Zenaro in 4 artìgołi:
- ZENARO/1 – EL BUCINTORO
- ZENARO/2 – CANAL DE ŁEME
- ZENARO/3 – PIERO ORSÈOŁO II
- ZENARO/4 – FESTA DE ŁA SENSA
