Piero Gonzaga (1/4)

Ła formasion – Pietro Gonzaga el nase el 25 marso 1751 a Łongaron da Francesco e da ła nòbiłe bełuneze Anna Grini. Ła profesion artìstega che ło rendarà famozo in Itałia e in Europa el ła erèdita diretemente da só pare, pitor de decorasion par edifisi privadi e pùbleghi ma anca de senografìe par teatri. Dopo ’verghe dato a’l fioło na prima formasion coinvolzéndoło inte’l só łaoro, el ło manda a Venesia a inprofondir łe só capasità e conosiense inte’l canpo pitòrego. Inte ła sità łagunare Pietro el studia ła prospetiva, in partegołare łe reałizasion in prospetiva angołare de l’insizor Giovan Battista Piranesi, el descoverze i grandi maestri de l’arte veneta cofà el Veroneze e el só dòparo de’l cołor, el cołàbora co pitori esperti che i oparava inte l’ànbito del’ vedutizmo, drio ła médema maniera de’l famozo Canałeto che l’influensarà i łaori de Pietro.