EL PAŁASO DOGAŁE INTE’L 1300 – Co ła Serada de’l Mazor Consejo de’l 1297 A vien triplegà el nùmaro de i consejeri e donca, a partir da’l XIV sèc, ła vecia “fàbrega Ziani” de’l pałaso comunałe ła vien restruturà deventando l’ała verso el moło de’l Pałaso Dogałe. Sora el Sałon de’l Piòvego A vien edifegà ła Sała nova de’l Mazor Consejo. Ła fasada, conforme a un stiłe conpozitivo de saor mediorientałe, ła rebalta el vodo par soto e’l pien par sora: e cusì ła parete ła se mostra cofà un tesudo cołorà de łozanghe fate su co pianełe de piera de Istria e roso de Verona. De soto, inte ła łoza a’l piano 1°, el zogo de trafori, serci e archi inflesi, che inte ła trìfora de San Marco el jerà confinà inte’l tełer de ła fenestra, cuà el se łìbara deventando ełemento portante autònomo e difarensiàndose cusì da’l resto de tuto el gòtego eoropèo: un de i paradigmi de l’architetura veneta inte i sècołi.
Da’l Łunaro Veneto 2022, Febraro in 4 artìgołi:
- FEBRARO/1 – ŁE VARIETÀ GÒTEGHE VENETE (1)
- FEBRARO/2 – ŁE VARIETÀ GÒTEGHE VENETE (2)
- FEBRARO/3 – EL PAŁASO DOGAŁE INTE’L 1300
- FEBRARO/4 – LA CAZA VENESIANA MEDIEVAŁE
