L’ALBESO DE’L RENASIMENTO IN VENETO – Inte’l ‘400 A se concretiza el progresivo zlargamento de ła Serenìsima inte ła Teraferma Veneta costituéndose cusì el Stato da Tera. El vispo anbiente culturałe pavan el pol vantar ła presenza par 10 ani de l’artista toscan Donatello che’l porta el vento novo de’l Renasimento inte l’arte. Ma a Venesia l’umanèzemo el sfadiga a far preza par via de na serta difidensa anca połìtega sora el recùparo e’l studio de łe antighità clàseghe. Se a Firense A ghe ze el Brunelleschi che’l fa su l’inovadiva cùpoła de’l Domo e L.B. Alberti che’l scrìe el “De re aedificatoria”, a Venesia invese A vien fata su ła Ca’ d’Oro in gòtego venesian, un łenguajo che’l tenjerà banco fin cuando, a’l scumisio de’l ‘500, el Renasimento el sarà sostenjùo anca a łeveło teòrego e culturałe. E donca acetà in canpo architetònego co ła “renovatio urbis” scumisià a Venesia da’l Sansovin e a Vicensa da’l Paładio.
Da’l Łunaro Veneto 2023, Desenbre in 4 artìgołi:
- DESENBRE/1 – L’ALBESO DE’L RENASIMENTO IN VENETO
- DESENBRE/2 – MÀURO CODUSI
- DESENBRE/3 – JOANI MARÌA FALCONETO
- DESENBRE/4 – MICHIEL SANMICHIEŁI
