VINCENSO SCAMOSI (2/2) – El só łenguajo architetònego concreto e rasionałe el ze na riełaborasion ma anca na contestasion de cueło paładian, pì ideałista. Inte ła Viła Pizani “Ła Roca” a Łonigo (1575) el modeło de ła viła-tenpio romita inte’l cołe el prezenta na fluidità de i spasi pì funsionałe respeto a cuełi de ła Rotonda. Viła Duodo, in costa a’l cołe de Monsèłeze (1593), ła ze ła sìnteze parfeta de’l raporto tra architetura e paezajo veneto. Inte ła Vila Mołin a ła Mandria (Padoa, 1597) el parfesiona ła só reserca sora e’l łenguajo clàsego prozetando el tiburio invese de ła cùpoła (a cuèrzar ła sała sentrałe a tripla altesa tuta afrescà), tamentre el pronao/łoza no’l ze pì l’ingreso ma’l ze un belvédar, e el zardin el deventa da’l bon parte integrante de ła planimetrìa. Tra łe altre só òpare: a Padoa el conpletamento de’l Pałaso de’l Bo (1560, prozetà da Andrèa Moroni) e ła Cieza de San Gaetan (1588).
Da’l Łunaro Veneto 2023, Majo in 4 artìgołi:
- MAJO/1 – VINCENSO SCAMOSI (1/2)
- MAJO/2 – VINCENSO SCAMOSI (2/2)
- MAJO/3 – STORIA VIŁE VENETE (1/2)
- MAJO/4 – STORIA VIŁE VENETE (2/2)
