Zuan Doménego Tièpoło (2/4)

Zuan Doménego Tièpoło (2/4): Viła Valmarana – Famozo l’è el cazo de ła viła Valmarana “ai Nani”, pena fora de Visensa. Łà Zuan Batista el ga raprezentà co’l só stiłe sublime raconti mitołòzeghi so afresco. Doménego, invese, el se ga ocupà prinsipalmente de ła podestarìa de ła viła, raprezentando imàzine pì naturałe, cofà aristocràteghi e contadini de’l tenpo insieme co sene de ła Cina łontana. Anca se serti (come Goethe) i ga credùo che tuti ’sti afreschi i fuse de Zuan Batista, A se połe notar el stiłe de’l fioło che’l taca farse difarente: ben pì reałìstego, irònego e dezincantà, a dir pì moderno e visin a’l novo spìrito iłuminista. Defati, tra łe figure prezente, A catemo dame małisioze, nòbiłi soti, contadini zvojài.