Prospetive de Architetura Veneta (3/4): CARLO SCARPA

CARLO SCARPA – El ze stà on architeto veneto nasesto a Venesia inte’l 1906 e morto a Sendài (Japon) inte’l 1978.

El se ga formà a l’Academia de łe Bełe Arte de Venesia e, tra i ani ’30 e ’40, el ga laorà inte la sèłebre viererìa de Venini, maurando donca na gran espariensa inte łe arti aplegàe.

El só stiłe el jera asè infruensà da l’arte japoneze, da łe òpare de’l architeto merican F. L. Wright e, par de pì, da n’autèntega cura maniacałe pa’l detajo e pa’l tratamento de i materiałi che ła ghe ga parmeso de èsar un inovador de’l łenguajo archìtetònego, soratuto inte’l canpo de’l restàuro.

Inte łe só òpare A se cata tute łe caratarìsteghe de l’architetura veneta – a partir da l’acua – insenbràe co un senso renovà de’l moderno che co coeło łu el ga suparà i dogmi stiłìsteghi de i só tenpi pa’ rivar a un stiłe puramente poètego: el materiałe a’l servisio de’l idèa e l’inzenjo a’l servisio de ła poezìa.

~

Da’l Łunaro Veneto 2019, Novenbre in 4 artìgołi:

  • NOVENBRE/1 – Na paroła: MARMORIN
  • NOVENBRE/2 – Un posto: TONBA BRION A SAN VIO DE INTIOŁE
  • NOVENBRE/3 – Un parsonajo: CARLO SCARPA
  • NOVENBRE/4 – Un evento: ŁA MOSTRA INTARNASIONAŁE DE ARCHITETURA (VENESIA)
Dizitałizasion de’l testo de Novenbre 2019 de’l Łunaro Veneto 2019.
Reprodusion autorizà da Academia de ła Bona Creansa