RONCADE – Inte ła sitadina de ła Marca Trevizana, ano 1875, A jera stà fondà ła dita “Carlo Menon” da parte de l’omònemo inprenditor veneto Carlo Menon (Roncade 1858 – Trevizo 1924).
Intel’l 1890 Menon, stimà costrutor de vełosìpedi, el se ga butà inte ła projetasion areonàutega vanti de 13 ani so’l primo voło de ła storia ma, maldestin, no’l ze stà bon de concretizar łe só idèe.
Co pì fortuna, inte’l 1895, el ga fabregà ła prima vetureta a cuatro rode in Itałia, achipajada co un motor De Dion & Bouton. De sèito el parfesionarà ‘sto protòtipo e’l costruirà par conto suo anca i motori produzendo cusì, fin a’l 1902, poco pì de vinti veturete e partesipando a varie conpetision.
De ‘ste cuà A ghe ne ze uncora una funsionante che ła partèsipa a manifestasion varie, soratuto in Veneto.
~
Da’l Łunaro Veneto 2020, Novenbre in 4 artìgołi:
- NOVENBRE/1 – SCUDERÌA SERENÌSIMA
- NOVENBRE/2 – RONCADE
- NOVENBRE/3 – ENRICO ZENO BERNARDI
- NOVENBRE/4 – CANPION de FÒRMUŁA 1
