CULTI EZISI – el fasino e el senso de mistero che l’Antigo Ezito l’èvoca i zera za sentìi inte’l mondo grego e roman, cuando che cueło ezisian dezà el gaveva un pasà miłenario a łe spałe. L’idèa de eternità raprezentà da ła siviltà ezisia ła zera raprezentà anca da i só culti rełijozi che i prometeva na vita inte l’aldełà, łigài soratuto a łe divinità de Ìzide e Seràpide. Presto ‘sti culti i se sparpanja in tuto el Mediteraneo antigo e anca inte ła Venetia ghe ne catemo dełe trase. A ze atestà da arcuanti resti archeołòzeghi ła prezensa a Verona de un tenpio a ła dea Ìzide, in partegołare iscrision dedegàe a eła e a Seràpide. Ła pozision de’l santuaro no ła ze ciara ma probabilmente el zera so ła riva sanca de l’Àdeze inte l’area de’l teatro roman. Anca Acuiłeja A ghe ze atestasion epigràfeghe de un santuaro a łe médeme divinità.
Da’l Łunaro Veneto 2022, Marso in 4 artìgołi:
- MARSO/1 – CULTI EZISI
- MARSO/2 – AŁESANDRIA & SAN MARCO
- MARSO/3 – PIERIO VAŁERIAN
- MARSO/4 – BELZONI & MIANI
