L'Avogadorìa de Comun (2/4): L'OCIO COSTITUSIONAŁE

L’OCIO COSTITUSIONAŁE – I Avogadori de Comun i gavéa par funsion pì intaresante e moderna de controłar łe figure pì inportante de ła Repùblega. Inte ła testa de’l Stato Veneto, łori i jera i oci. Łe só funsion łe jera de tuteła de ła łegałità e de l’aseto costitusionałe.

In partegołar, a i avogadori A ghe zera demandà de ispesionar łe scriture contàbiłe de i Camerlenghi (i majistradi sora łe finanse pùbleghe) e de revizionar łe case de i ofisi de San Marco e de Rialto. Pardepì, i promoveva l’acuza avanti el Major Consejo contro de i sìngoli conponenti de’l Consejo steso e, za da’l Cuatrosento, i podeva mandar soto judisio anca el Doze.

I gavéa derito de vèrzar intarogasion co i menbri de ła Sinjorìa, che i jera in òbligo de respóndarghe. I podeva opónarse contro l’asunsion o l’ezersitar de carghe pùbleghe da parte de parsone che łe gavese subìo na contestasion łegałe.

I podeva móvarghe amonision a i majistradi e sotopónarli a pagamenti in amenda, investigàndołi par ipòteze de denunsie par corusion e portàndołi in banco de proseso avanti el Supremo Tribunal de ła Cuarantìa. I podeva, co ła prosedura de l’“intrométar”, mandar in sospension l’ezegusion de un decreto de’l Major Consejo che i intravedese danozo par el ben pùblego.

~

Da’l Łunaro Veneto 2019, Apriłe in 4 artìgołi:

  • APRIŁE/1 – Na paroła: AVOGADOR
  • APRIŁE/2 – Un posto: L’OCIO COSTITUSIONAŁE
  • APRIŁE/3 – Un parsonajo: AVOGADORI DE COMUN
  • APRIŁE/4 – Un evento: L’AVOGADOR VENESIAN (COMEDIA)
Dizitałizasion de’l testo de Apriłe 2019 de’l Łunaro Veneto 2019.
Reprodusion autorizà da Academia de ła Bona Creansa

Leggi altri articoli: