“L’Arte de l’abbaco” – Inte l’ano 1478, a Trevizo, el ze stà dà fora “L’Arte de l’abbaco”, a dir el pì antigo manuałe de aritmètega publegà a stanpa in Ocidente e un tra i primi testi sientìfeghi stanpài in Europa. El ze anca conjosesto co’l nome de “l’Aritmètega de Trevizo”.
El ze on manuałe pràtego pensà par l’autoaprendimento e par el dòparo de tuti i dì inte’l comersio e defati el ze stà scrivesto in łengua volgare misiando veneto e toscan.
Par ‘sto motivo el ga da èsar considarà na òpara fondamentałe inte’l proseso de sparpanjamento de ła conosensa matemàtega da ła clase intełetuałe ełitaria a ła clase media.
El ze un tra i primi cazi de dòparo, in Ocidente, de’l sistema de numarasion àrabo inte i càlcołi algorìtmeghi. Łe copie ancora ezistente de l’òpara łe ze asè ràdeghe, e una de ‘ste cuà ła ze custodìa rento ła Manuscript Library de ła Columbia University inte i Stati Unidi, co’l nome de “Treviso Arithmetic”.
~
Da’l Łunaro Veneto 2019, Setenbre in 4 artìgołi:
- SETENBRE/1 – Na paroła: ÀBACO
- SETENBRE/2 – Un posto: ŁUNA
- SETENBRE/3 – Un parsonajo: JÀCOPO FRANSESCO RICATI
- SETENBRE/4 – Un evento: “L’ARTE DE L’ABBACO”
