Ła giosa ła scava ła piera (3/4)

I CADINI DE’L BRENTON – Vizitando invese ła vałe de’l Mis, inte’l Parco Nasionałe de łe Dołomite Bełuneze, A se se cata de fronte a n’altra forma de arte oparà da l’acua. El refarimento l’è a i “cadini de’l Brenton”, na serie de 15 profonde cavità scavàe da’l torente Brenton. Inte ’sto cazo l’acua ła demostra ła forsa che ła ga co ła casca da l’alto, creando dełe buze dove che, manman che łe deventa pì fonde, ła se move come inte un vòrteze, scavando cusì łe cavità da l’interno dàndoghe ła forma a “cadin”. Łe cavità, pozisionàe drio el corso de’l torente, łe ga na profondità variàbiłe, rivando fin a 4 metri, dàndoghe a l’acua a l’interno varie tonałità de cołor.