Ła Sasìfraga de i Monti Bèreghi (1/4)

I ENDEMIZMI – Un endemizmo el ze na spese vezetałe o animałe che ła ze escluziva de un dato areałe, in teorìa anca vasto asà cofà un intiero continente, ma de sòłito ‘sta denominasion ła se àplega cuando che ła spese in cuestion ła ze prezente inte na zona reładivamente poco esteza. A se fa, po’, na distinsion tra pałeoendemizmi e neoendemizmi. Inte’l primo cazo ła spese ła zera inte’l pasà difondesta su na area ben pì vasta ma, pa’l mudar de łe condision climàteghe e anbientałe, ła se cata restreta a na zona łimità, inte’l secondo cazo ła spese ła ze de conparsa resente e in futuro ła podarìa espàndarse ulteriormente. Anca el Veneto el ga i só endemizmi, soratuto a łiveło de flora e inte łe zone montuoze o cołinare, cofà el Monte Baldo o i Bèreghi, ma anca come fàuna, cofà el carpion, na spese de pese prezente soło che inte’l Łago de Garda.