I busołà i ze biscoti venesiani, tìpeghi de l’ìzoła de Buran; defati i vien ciamài anca “buranèi”. I vien fati , sora de tuto, co i rosi de i ovi, farina, sùcaro e na gran paca de butiro; e par cuesto i ze asè całóreghi!
‘Sti biscoti i eziste da i tenpi de ła Repùblega Veneta. De seguro, inte’l 1500 i gera za prezenti inte łe caze de i veneti, come ch’A ze testimonià da racuante antighe piture. A me riferiso, par ezenpio, a ła pitura de’l Fazoło (inte ła Viła Caldonjo, a Caldonjo, provinsa de Vicensa), che ła mostra on grupo de nóbiłi torno de na vantiera de busołà. Ma penso anca a’l famozo cuadro, de’l 1775, “ła ciocołata de’l matin”, de’l pitor veneto Piero Łonghi.
Antigamente, daché i busołà i ze nutrienti e i ga ła caraterìstega de conservarse par on mucio de tenpo, i buranełi i venjéa parecià, in gran cuantità, da łe mojere de i pescadori e de i marineri che i fazeva łonghi viaji in mar.
In tenpi resenti, ła forma de i buranełi ła ze pasà da cueła a “aneło” a cueła a “ese”, parché cusita A se va mejo a insuparli inte’l vin dolse o anca inte’l łate a cołasion. A Buran, a’l dì de oncó, come na ‘olta, A ze costumansa pareciarli o cronparli in ocazion de ła Pascua. E A se dize che, na ‘olta, i busołà aromatizà co ła vaneja i venjéa doparà anca intortołà ne i pani, par profumar i canti de armaroni e bufeti.
Dito tuto cuesto, a łèzar de robe bone da manjar, A no ve zeła mìa venjesta fame? Mi A credo de sì! E donca vardemo suìto come ch’A se parecia i busołà!
Ingredienti:
- 250 g de farina
- 80 g de sùcaro
- 100 g de butiro
- 3 rosi de ovi
- scorsa gratà de un łimon
- aroma de vaneja
Parecio:
- insebré i rosi de i ovi co’l sùcaro e co’l butiro presedentemente fondesto, misié el conposto e łasè che’l venja fredo. Zonteghe ła farina e łaoré l’inpasto co łe man, pa’ on bel tochetin;
- aromatizé l’inpasto co ła scorsa de’l łimon gratà e co l’aroma de vaneja;
- fe su na bała co l’inpasto e feła repozar inte’l frigo par 20 menuti;
- despartì l’inpasto in tochetełi e dazighe ła forma de na “ese” o de on aneło;
- metì i biscoti so na teja (sora na carta da forno) e cuzinełi inte’l forno a 170°C par 15 menuti;
- desforné i biscoti e łasé che i se sòra.
Bon apetito!
Diego R.
