NA MEMORIA ÙTIŁE IN TANTE DEZGRASIE – rivà Venesia Piero Cuerini el scrive zó el rezoconto de ła só dezaventura par el Senado de ła Repùblega, testimoniansa ùnega e incredibilmente presiza de cueło che’l ga vivesto.
Inte’l só rezoconto, Piero Cuerin el descrive el vìvar de łe popołasion de łe ìzołe Łofoten. El ne conta de ‘ste parsone sénplise e zeneroze, suito pronte a acetar łu e i só conpanji inte’l bezonjo, pur gavendo ben poca richesa. Ma i zera boni de sostentarse produzendo un partegołar tipo de manjar, che i vendeva fin in Zermania. El reporta che i łasava i merłusi a secarse a’l vento e co i vołeva manjarseli i łi bate e łi consa, altrimeni i łi mete soto sałe par spedirli so’l continente e vadanjarghe calcosa.
A se pensa, donca, che’l sie stà łu a ‘ver portà inte ła Venetia ła reseta de’l bacałà. Reseta che ła gavarà presto na fama granda, nasendo drioman pì maniere par pareciar el bacałà, el pì noto l’è cueło “a ła vizentina”.
ŁA RESETA DE’L BACAŁÀ A ŁA VIZENTINA – Par pareciar el bacałà a ła vizentina A ocore tor del stocafiso, un merluso secà sù e mìa sałà (romài vendùo de frente za batùo). Donca, el stocafiso el va meso in moja par 3-4 dì. Da recordar che daspò ła moja el ciapa pezo: par ezenpio par 4 parsone A se tołe 400 grami de stocafiso secà che i deventarà 700.
Scomisiando, A bezonja tajar na ségoła in fete e far el stocafiso in tochi, cavando via łe łische e ła pełe. Fa’ rozołar 100 grami de ségoła inte na teceta co un fiło de ojo de ołiva. Zonta dełe sarde e’l parsémoło e fa’ rozołar tuto par calche menuto. Infarina intanto i tochi de stocafiso. Dapò meti inte ła teceta el stocafiso infarinà e ròzołeło su par zo 5 menuti, a ła fine zonta ła ségoła. Zonta ałora el łate, el parmezan, un fià de ojo uncora, pévaro e sałe e meti sù el covercio. Cozi el tuto par 3 ore a fogo łento.
A se conseja de servir el bacałà a ła vizentina co ła połenta, magari griłià.
~
Da’l Łunaro Veneto 2021, Zunjo in 4 artìgołi:
- ZUNJO/1 – VERSO ŁE FIANDRE
- ZUNJO/2 – DA’L SÌRCOŁO POŁAR A VENESIA
- ZUNJO/3 – NA MEMORIA ÙTIŁE IN TANTE DEZGRASIE
- ZUNJO/4 – ŁA RESETA DE’L BACAŁÀ A ŁA VIZENTINA
Dizitałizasion de’l testo de Zunjo 2021 de’l Łunaro Veneto 2021.
Reprodusion autorizà da Academia de ła Bona Creansa
