In ‘sti ùltemi tenpi un fià de dhent ła è despromozà parché, par serti motivi sanitari, A no se pol pì nar in volta co ła bandiera che pì ła ne piaze e ła ne raprezenta. E mi, che A so’ sai càncaro e tachente, A me dimando se sipia o manco el cazo de fàrghine un małan. A dir: de fronte a na desfida, a na conpetision, ało pì senso métarse in zogo e zogar – sporcàndose man, piè, oci e recie – opur métarse in mostra e tifar, tuti bełi inbełetài de cułuri, barete e bandierete?
Par zogar A conje, vanti de tut, capir come che’l funsiona el zogo, capir se A so’ in grado de zogar e capir de che pasta che’l ze fato el me aversaro. Masa fadiga. Par vìnsar łora A ze mejo che calcun’altro el dhoghe a’l posto meo, e cusita mi A pose mètarme beło còmodo a far el tifo par łu, far festa e far el sproto se par cazo łu el vinse. Opur mocàrmeła e darghe ła colpa se par cazo el gavese da pèrdar.
Ma el tifozo, par cuant che’l se diverte, el ga un deficit mìa da poc: oltra che no saer dhogar, łu no l’è njanca tenjùo a conjósar łe règołe de’l zogo. A łu A ghe ze concesa ła pedho zventura che ła pol capitarghe a un èsare uman: a dir, rajonar sensa cao de robe de che no’l capise scuazi njent. E donca el se parmete de esprìmarse sensa ciorse sù nisuna responsabiłidà de cuel che’l dize. El tifozo no’l pensa e no’l parla: el tsiga, el ruta, el spudhacia e fursi no’l sa njanca łu parché.
Se vialtri A vułì saer come ła ze ndà na partìa, o pedho uncora come che’l funsiona un zogo, A no ste’ mai dimandarghe a un tifozo parché łu el varda ma sensa capirghe njent. E a che scopo el gavarìa dovest capìrghine calcosa? A łu A gh’intaresa solche tifar e farse védar instrafantà. Un sèłebre e controverso crìtego muzegałe el dize de no dimandarghe mai na opinion de mùzega a i fanàteghi che i se vanta de scoltar da na vita senpre i stesi artisti, e scuazi njent fora de łori: cosa vułìo che i ghe ne sapia? I è łe parsone pì inconpetenti che podì catar in volta, siben che łuri i se vanta de èsar asè esperti parché i sa tut de’l só ìdoło. Ma solche de łu, sacranon!
Donca eło mejo darse da far par inparar a dhogar pułito, magari arlenàndose fazendo fadiga e zbałiando pur? O eło da pèrdar tenpo, invetse, a piàndhar par via che no se pol far i tifozi co łe bandierete?
A l’Ereziarca łe łanje łe ghe ga senpre fato afano…
