L'Avogadorìa de Comun (3/4): AVOGADORI DE COMUN

AVOGADORI DE COMUN – A se prezume che l’istitusion de ’sta majistradura antiga asè ła sipie stà verso l’ano 1191. Łe só conpetense łe jera cuełe de deféndar i beni de ła Repùblega e de’l Stato e de sanar łe diatribe e łe càuze intra fisco e privadi.

Łe mansion de l’Avogarìa de Comun łe ze stà de protesion e de defeza de i deriti drio łe łeze de’l Stato Veneto. Inte’l 1264, a l’Avogarìa de Comun A ghe ze stà confidà el judisio de i apełi contro de łe sentense de condane a morte, a ła prezon o a l’eziłio, emanàe da’l Stato. ’Ste mansion sucesivamente łe ghe ze stàe asenjàe ła Cuarantìa Criminal.

L’Avogarìa de Comun ła gavéa el cònpito de controłar łe case de San Marco e de Rialto, de bołare i scrinji par inpedir łe sotrasion de danari e de aplegar łe confische detarminàe da’l Consejo de i Dieze.

Da’l 1319, i ga avesto l’incargo de sorvejar che nesun foresto el venjese rento, sensa gaver el parmeso, inte’l Major Consejo.Inte i primi ani de ełesion de ’sto autorévołe majistrado, l’istitusion ła jera conponesta da tri menbri.

~

Da’l Łunaro Veneto 2019, Apriłe in 4 artìgołi:

  • APRIŁE/1 – Na paroła: AVOGADOR
  • APRIŁE/2 – Un posto: L’OCIO COSTITUSIONAŁE
  • APRIŁE/3 – Un parsonajo: AVOGADORI DE COMUN
  • APRIŁE/4 – Un evento: L’AVOGADOR VENESIAN (COMEDIA)
Dizitałizasion de’l testo de Apriłe 2019 de’l Łunaro Veneto 2019.
Reprodusion autorizà da Academia de ła Bona Creansa

Leggi altri articoli: