Ła festa de ła Sensa (Asension) ła jera ła festa pì inportante de ła Repùblega Veneta, in onor de ła vitoria de l’ano 1000 contro i pirati, che ła ga de fato verto ła via a ła Repùblega par espàndar i só comersi e deventar na potensa so’l mar.
Ła spedision ła zera partìa el dì de ła Sensa: el dì justo donca par sełebrar onji ano na benedision sołene de’l mar.
El Doze el ndava co un nùmaro grando de inbarcasion oltra de ła boca de Porto de Łido e el véscovo de Ołìvoło el ghe zirava tórno co n’altra barca a’l Bucintoro de’l Doze, benedizendo el mar co un rameto de isopo (pianta salvàdega sacra).
Par rivar parò a’l Spozałisio de’l mar vero e propio A bezonjarà spetar 200 ani, cuando che’l Papa Ałesandro III par rengrasiar par ła protesion da l’Inperador Federigo Barbarosa, el ghe darà ła consesion a Venesia de sełebrar l’union co’l mar.
~
Da’l Łunaro Veneto 2020, Zenaro in 4 artìgołi:
- ZENARO/1 – EL BUCINTORO
- ZENARO/2 – CANAL DE ŁEME
- ZENARO/3 – PIERO ORSÈOŁO II
- ZENARO/4 – FESTA DE ŁA SENSA
